لماذا مصر ام الدنيا؟؟ – محمد عبد القدوس

بعيدا عن الجعجعة والشعارات الضخمة والكلام الكثير فإن التاريخ يؤكد أن مصر ام الدنيا:
🌿‏ لما بدات أقرأ في تاريخ مصر، كنت كل يوم اكتشف حاجه ‏عجيبه ، كانت مصر تقريبا اكثر بلدان العالم ‏استقبالا ‏للمهاجرين ‏من كل مكان وبمعنى أدق الهاربين من الجحيم ‏في بلادهم، فعلى سبيل المثال لا الحصر لما ‏اجتاحت ‏المجاعات ‏بلاد المغرب والجزائر هرب الآلاف من أهلها خوفا من ‏الجوع وملقيوش حد يستقبلهم غير مصر، ‏فكانوا ‏بيدخلوها قبائل كاملة ‏بالآلاف والكلام دا كان من حوالي 400 سنة ، ولما الإسبان طردوا ‏المسلمين من الأندلس ‏أخدوا بعضهم وراحوا على مصر واستقر معظمهم في كفر الشيخ لدرجة إن فيه قرى كتير في ‏المحافظة دي بأسماء ‏اندلسية، ومع مرور الزمن كان ‏المغاربة كل يوم يجيبوا قرايبهم يعيشوا في مصر ‏ ، من الطريف إن بعدما ‏أصبحت ‏الأحوال ‏افضل في بلاد المغرب والجزائر ما رجعوش بلادهم بل العكس فضلت مصر تستقبل أعداد متزايدة ‏فالمغاربة كانوا بيروحوا ‏للحج في مكة ‏ولما يرجعوا تستهويهم العيشة في مصر.‏
🌿من حوالي 150 سنة لما قامت حرب أهلية كبيرة في لبنان ‏بين الدروز والموارنة لدرجة إن كان بيموت يوميا أكتر من ‏ألف شخص ملقوش برضوا قدامهم غير مصر وهاجروا ‏ بالآلاف ومعظمهم استقر في ‏المنصورة وخرج منهم رئيس ‏لبنان ‏المعروف باسم أمين الجميل، والعجيب إن الدروز كمان لما ‏هربوا جم إلى ‏مصر، وكان ممن هربوا لمصر ‏الفنان الكبير ‏فريد الأطرش، وهكذا استقبلت مصر كل المتحاربين ‏في لبنان.!‏
🌿‏ في بداية القرن ‏العشرين حصلت مذابح الأرمن الشهيرة فهرب ‏الأرمن من جحيم الأتراك وملقوش قدامهم غير مصر ‏يهربوا إليها ‏‏!! ما عندك أوروبا قريبه منكم ؟ قالوا لأ إحنا مرتاحين في ‏مصر ‏وخرج منهم ‏الفنانة نيللي ولبلبة وفيرزو ‏وأنوشكا ولايزال ‏الأرمن عايشين معانا مصريين أصليين.. أما الطبقة المثقفة في سوريا ‏فكان الأتراك بيضيقوا الخناق ‏عليهم برضوا ملقيوش قدامهم غير مصر ودخلت الصحافة والمسرح على أيديهم لمصر.. اليونانيين كانت كانت الحرب ‏الأهلية ‏تمزقهم فهربوا بالآلاف إلى مصر وكونوا جالية ضخمة عاشت عمر ‏طويل في مصر وتشهد عليهم مدارسهم ‏ومبانيهم.‏
🌿‏ حتى الإيطاليين أثناء ‏الحرب العالمية الأولى والثانية هربوا من ‏جحيم الحرب إلى مصر وملقيوش اجمل من مصر ‏يعيشوا بها ‏واكبر تجمعاتهم ‏كانت في إسكندرية والمنصورة، ويمكن اشهرهم ‏الفنانة الإيطالية داليدا بنت شبرا المولودة في ‏مصر.. حتى آخر ملوك ‏إيطاليا ‏اختار مصر يموت فيها.. ..آخر ملوك ايران الشاه محمد ‏رضا بهلوي محدش استقبله غير ‏مصر ومات فيها، حتى الملك سعود ملك السعودية اللى كان بينه وبين عبد الناصر عداوة ..لما خلعه إخوته من حكم ‏السعودية يروح فين؟ ملقاش غير ‏مصر تستقبله على أرضها ، أما اعظم ثائر كونغولي وهو ‏بياتريس لومومبا لما بلجيكا ‏قتلته بوحشية هربوا أطفاله لمصر.. ‏
‏ ‏🌿‏ أما أرق من هرب من الجحيم إلى مصر فكانت السيدة ‏زينب ‏حفيدة رسول الله صلى الله عليه وسلم و‏أهل البيت ‏الشريف التي لم تجد افضل من مصر لتستقبلها ‏ولازلنا ‏نحتفل بقدومها إلى مصر كل عام في مولدها الشهير.‏
🌿‏ وقبلها بسنين طويلة استقبلت مصر أسرة صغيرة معاهم ‏طفل صغير كانوا هربانين من بطش الرومان اللى كانوا ‏بيقتلوا ‏أطفالهم .. فقالوا مفيش بلد هتحمينا غير مصر.. الطفل الصغير دا ‏كان سيدنا المسيح وامه العذراء مريم.. يا الله.. ‏ولحد النهارده خط ‏سير رحلة المسيح معروفة بدقة والشجرة اللى احتموا تحتها موجودة.‏
🌿‏ وقبل سيدنا المسيح بسنين طويلة هربت عيلة سيدنا يوسف ‏من ‏جحيم المجاعة راحوا فين ؟ ملقيوش غير أخوهم ‏يستقبلهم في ‏مصر ويعيشوا على أرضها مئات السنين ويكونوا فيها ‏القبائل ‏الإسرائيلية الرئيسية التي تحولت لألد أعداء ‏مصر بعد كدا، ‏أما الهجرة السودانية والنوبية إلى مصر فلم تنتهي أبدا واللي قال ‏مصر والسودان شعب واحد مكدبش بيننا ‏وبينهم رباط ليوم الدين. ‏
🌿أمرك غريب يا مصر؟!‏
‏ كل العالم كان يعاني إما من الحروب أو ‏المجاعات معندش غير مصر يهرب إليها في حين إن ‏مصر شافت أهوال طول ‏تاريخها… مجاعات واحتلال ورغم كدا مفيش أية هجرة جماعية خرجت من مصر، فرغم أن في أحد ‏الأزمنة ‏كان الناس ‏في مصر بيموتوا من الجوع لدرجة نبش القبور، مفكروش ييسيبوا مصر.. مصر كانت ‏طول ‏تاريخها دولة بتجذب السكان ‏، وحتى النهارده رغم صعوبة الحياة ‏ورغم إن الكل بيقولك عاوز اهاجر ولكن اللى ‏بيهاجر فعلا ‏مبيقدرش يمنع نفسه عن ‏مصر وبيفضل مرتبط بها لآخر لحظة في ‏عمره. ‏
🌿عارف يعني إيه بلد يهرب ليها الناس من الجزائر والمغرب ‏وليبيا وتونس والسودان والنوبة والعراق وسوريا ‏ولبنان ‏وفلسطين ‏والجزيرة العربية واليونان وقبرص وأرمينيا وخوارزم وأوزبكستان ‏وإيطاليا، ماهي البلاد دي كانت زمان ‏هي كل ‏الدنيا.‏
🌿أنا مكنتش فاهم ايه السبب ان مصر فيها اكبر عدد سكان في ‏الدول العربية، ومكنتش فاهم يعني ايه مصر ام الدنيا ، ‏لكن ‏بعد ما ‏استوعبت ان مصر احتضنت القادمين من كل دول العالم واصبح ‏بمثابة أم لهم كلهم ، حسيت إن كلمة أم الدنيا ‏دي ‏قليلة أوي أوي أوي ‏على مصر فهي أم الدنيا وست الدنيا رغم حقد الحاقدين.‏
أعدها للنشر
محمد عبد القدوس

اترك تعليقاً