إمبارح رحت “المنتزه باي” بعد زن الولاد. قلت ماشي، على الأقل نتفرج على المنتزه بعد أعمال التطوير
بداية :
رسم الدخول ٢٥ جنيه للفرد .. تدخل مباشرة بعربيتك فى اتجاه إجباري على البارك عشان تدفع (50) جنيه رسوم جراج
طيب أنا عايز أروح الشاطئ يقولك فيه Golf car هتوصلك يا فندم .. تفاجئ ان الناس واقفة فى طابور طويل واخدين حاجتهم ومنتظرين دورهم في الـ Golf car ..
بعد وقفة نص ساعة جينا نركب لقينا عربية الجولف بتذاكر (20) جنيه للفرد .. قلت تمام وماله 🤷
لغاية هنا إنت شايف (3) جراجات ضخمة على أعلى مستوى من التصميم بس للأسف إحتلت تلت مساحة المنتزه حرفيا ً وعكننت على الزائرين بترك سيارانهم وتحميلهم رسوم ملهاش أى داعي.. بس ماشي خلينا نكمل.
ركبنا ( الجولف كار ) وبنتفرج على حدائق المنتزه إللي كنا نعرفها لكن فين هي؟
طرق انترلوك شكلها حلو بس مش مريحة للدراجات ولا حتى للجولف كار اللى راكبينها ..
شجر المنتزه المتبقي حالته سيئة .. محتاج شغل وصيانة وتقليم .. مخلفات بناء ونجيلة محروقة .. مفيش روح ولا انسجام ولا إحساس البراح اللى كان موجود ولا احنا ماشيين في ظل اشجار .. الشمس في كل مكان بعد تقطيع الأشجار !
وصلنا الشاطئ .. لقينا رسوم (125) جنيه للفرد قلنا ماشي ودخلنا الشاطئ لقينا كرسي لكل فرد وشمسية للمجموعة .. قلنا تمام ، الشاطئ بشكل عام كويس .. الميه جميلة وبحر مفتوح وعاملين حاجز أمواج، بس إدارة تعبانة وأسلوبهم زبالة .. بس لابسين يونيفورم🙄 .. الحمامات وأماكن تغيير الملابس مش نضيفة ، وزحمة لإن عددهم قليل ومفيش أي نظافة طول اليوم.
أسعار الطلبات فيها استعباط للناس، كوباية الشاي مثلا بـ (40) جنيه، فنجان قهوة تركي (50) جنيه، علبة كانز مياه غازية (40) جنيه البيتزا معقولة أسعارها تبدأ من 90جنيه.
وطول الوقت حوارات بين المصيفين والمنظمين على القعدات والشماسي.
المكان بصفة عامة معقول بس خسارة موقع بالجمال ده وميبقاش أحسن بكتيير من كده ، يكفي إن الناس بصفة عامة مش مبسوطين وجايين علي الريفيوز العالية للمكان.
فى آخر اليوم عايزين نرجع الجراج .. استنى الـ Golf car و إنت ورزقك بقى .. مافيش نظام ولا دور ولا منظمين .. نظام سواقين توكتوك انتظرنا نص ساعة ومافيش أمل العربية تيجى قولنا نمشي للجراج طبعا مشواأاار بس كانت قفلت معانا خلاص.
بشكل عام أقدر أقول إن مشروع تطوير حدائق المنتزه مشروع فاشل .. المكان قل ما زادش وبقى متعب ومكلف .. مفيش كونسبت مدروس غير تحصيل تذاكر .. إنما راحة وتطوير ومحافظة على مكان راقي متلاقيش. حقيقي تجربة لن نكررها.
(منقول)
