Mahmoud Allam
النهارده يوم تاريخي، وبالشفا يا ترامب، تعيش وتاخد غيرها… أمريكا وقعت رسميًا على وثيقة التفاهم، وإيران استلمت مفاتيح المنطقة على الجاهز!
المذكرة تم توقيعها عن بعد من شوية ما بين الطرفين، والبنود الواردة فيها دي منقدرش نقول عليها مجرد اتفاق لوقف الحرب… دي خسارة استراتيجية مدوية للولايات المتحدة الأمريكية!
ترامب اللي دخل المعركة دي بهدف كسر النظام الإيراني وتدمير البرنامج النووي وبرنامج الصواريخ الباليستية، خرج منها وهو بيمضي على بنود بتثبّت أقدام طهران أكتر من أي وقت فات، لدرجة إن الساحة السياسية الأمريكية مقلوبة دلوقتي والكل شايف إن الاتفاق ده هو وثيقة استسلام أمريكية، لإن واشنطن حرفياً قدمت كل التنازلات الممكنة من غير ما تحقق أي أمن حقيقي لشعبها أو لحلفائها…
تعالى أقولك أول صدمة على لسان ترامب نفسه 
العجل البرتقالي من شوية طلع بتصريح غريب جدًا ومصدقتوش لما سمعته، لحد ما اتأكدت منه بنفسي… قالك إن “مش من العدل إن إيران ما تمتلكش صواريخ باليستية مادامت فيه دول تانية في المنطقة والعالم عندها الصواريخ دي”!
انت فاهم معنى التصريح ده أيه؟!
التصريح ده عبارة عن قنبلة سياسية، لإنه ببساطة بيدي شرعية علنية ومباركة أمريكية للبرنامج الصاروخي الإيراني، وبيقفل الباب تمامًا أمام أي محاولة للتفاوض عليه أو تحجيمه في المستقبل… وده اللي بالفعل خلى المتحدث باسم الخارجية الإيرانية “إسماعيل بقائي” يطلع ويقول إن صواريخ إيران اتصنعت للإطلاق وليس للتفاوض عليها مع أي جهة!
الصدمة التانية هي ان البرنامج النووي رسميًا خارج الكلام تمامًا وهيتم التفاوض عليه “في وقت لاحق”، وهيسيبوا لإيران برنامجها النووي الحالي مع الاتفاق على تخفيض التخصيب وعدم امتلاك أسلحة نووية.. نفس اللي إيران كانت بتقوله اصلا من زمان، مع فرق انهم مش هيتخلوا عن البرنامج النووي أبدًا…
أما الغنيمة الأكبر والأخطر في الاتفاق فهي مضيق هرمز، اللي كده يعتبر اتحول برضا أمريكا من ممر مائي دولي حر، لموقع نفوذ إيراني خالص بالتعاون مع سلطنة عُمان لإدارته و(ربما بنسبة كبيرة) فرض رسوم وجمارك على السفن اللي هتعبره في المستقبل…
يعني شريان الطاقة العالمي بقى رسميًا تحت إيد طهران!
كمان الاتفاق اتربط رسميًا بانسحاب اسرائيل من لبنان، وورد ذكر اسم لبنان 3 مرات في البند الأول من المذكرة بحسب تصريحات إسماعيل بقائي… يعني كده لبنان بقت طرف رسمي من المعادلة…
في النهاية، إيران خرجت من الحرب دي كسبانة في كل الملفات، هيرجعلها ما يصل إلى 100 مليار دولار من أموالها المجمدة، وهيتعملها صندوق إعادة إعمار بقيمة 300 مليار دولار هيموله الخليج، واترفع عنها الحصار البحري وعقوبات النفط بالكامل، وهتجذب استثمارات ضخمة، وفوق ده كله حافظت على مخزونها من اليورانيوم المخصب والقدرات النووية اللي ترامب كان بيوعد بتدميرها…
اللي حصل النهارده ده تاريخي… حدث مش هيتكرر ومشوفناش زيه قبل كده، وصفعة على وجه الإمبراطورية الأمريكية، هيكون ليها تبعات جيوسياسية كبيرة…
الحقيقة انا مش عارف ازاي ترامب ونتنياهو هيواجهوا العاصفة السياسية اللي هيحدثها الاتفاق ده، واللي بدأت بالفعل تتكون عندهم دلوقتي، لكن نقدر نقول ان الأجواء عندهم هتكون عاصفة خلال الأيام اللي جاية… ف بالشفا وكل سنة وانتوا طيبين 